أسرار البحث في جوجل | معلومات قد تخفى عليك
يمكن كتير مننا بقي يسمع الجملة المشهورة دي في السنين الأخيرة You Don’t Know it Google it، من كتر أهمية جوجل تم استحداث فعل جديد في اللغة الانجليزية اسمه Google it: معناه ابحث عنه في جوجل.
ودا يبين لك قد إيه جوجل أصبح مهم جدا في حياتنا وعشان كدا كان لازم نعرف أسرار البحث عليه…
في المقال دا هنتكلم عن بعض أسرار البحث في جوجل اللي يهمك تعرفها، ولكن خلينا نسأل الأول…
هو جوجل بيعرف ايه؟
جوجل يعتبر أكبر منصة بحثية على الإطلاق، وبالتالي بيتوفر عليه كم مهول من المعلومات في مختلف المجالات والعلوم، يعني على سبيل:
- اكتب google timer تظبط وقت البدء والنهاية.
- جوجل بيعرف يحسب: اكتب calculator هتلاقي آلة حاسبة.
- جوجل يقدر يحول من وحدة قياس لوحدة تانية زي من ميللي متر لكيلو متر
- جوجل بيعرف العملات النقدية و تحويل العملات على مستوى العالم زي إن الدولار بيعمل كام جنيه مصري مثلا؟
- جوجل بيعرف كل التعريفات لكل المصطلحات العلمية في كل المجالات.
لو عايز تعرف أكتر عن البحث في المجال العلمي، شوف المقال دا: أسرار جوجل | البحث في المجال العلمي GOOGLE SCHOLARS
- جوجل بيعرف عناوين ومواعيد كل الأفلام العالمية.
- جوجل يقدر يوفر ألبومات الأغاني والموسيقى لأي فنان في العالم بالسيرة الذاتية بتاعته وكل أعماله كمان، وطبعًا بجانب مؤلفين الكتب والروايات.
لو عايز تعرف أكتر عن طرق البحث عن الكتب، شوف المقال دا: أسرار جوجل | البحث عن الكتب
- جوجل بيعرف كل رحلات الطيران من وإلى الأماكن المختلفة.
- جوجل بيعرف الإحصائيات والأرقام العالمية ومؤشرات الأسهم في البورصات العالمية والمحلية.
- جوجل بيعرف المناخ على مستوى العالم بجانب مواعيد شروق وغروب الشمس، دا غير إنه بيعرف التوقيت المظبوط في أي بلد في العالم.
- جوجل بيعرف الإجازات الرسمية والأعياد الدينية والقومية.
- جوجل بيعرف نتيجة المباريات والمسابقات الرياضية وكل ما يخص أخبار الرياضة.
- جوجل بيعرف يحسب قوة الزلازل التنبؤية.
جوجل بيعرف كل البيانات والمعلومات العامة لأي حاجة زي الأوبئة والأمراض على مستوى العالم، وأخيرًا وليس آخرًا… جوجل بيعرف يترجم.
وعشان نعرف أكتر عن أسرار البحث في جوجل لازم نعرف الأول إيه هي عناصر البحث…
ايه هي عناصر البحث في جوجل؟
Autocomplete الإكمال التلقائي
ودا معناه إنك بمجرد ما تكتب حرف من الكلمة اللي أنت بتبحث عنها، هتلاقي جوجل بيقترح عليك أي حاجة مشابهة أو مكملة للحرف اللي أنت كتبته، وبيخمن دا عن طريق الـ history بتاعتك يعني أنت متعود تبحث عن إيه.
Google Instant البحث الفوري
ودا معناه إنك بمجرد ما تكتب في مربع البحث المصطلح اللي بتبحث عنه، هتلاقي جوجل بيقترح عليك كل النتائج المحتملة وكل ما بتكتب أكتر النتائج بتتغير عشان تلائم اللي حضرتك بتبحث عنه وبمجرد ما تلاقي نتيجة البحث المرجوة بتتوقف أنت عن الكتابة… طب يا ترى دا لازمته إيه؟!
وجدوا إن الـ google instant بيسرع عملية البحث وبيوفر عليك في كل مرة بحث وقت بيضيع فبالتالي وقت البحث بيكون أقصر بكتير وطبعًا أنت تقدر تتحكم فيه زي إنك تفعله أو تلغيه على حسب احتياجك.
إزاي بتفعله؟… بتضغط على الزر أعلى يمين الشاشة – منها إعدادات setting ومنها عندك اختيارين:
- always show instant results أظهر البحث الفوري دائما.
- never show instant results لا تظهر البحث الفوري أبدا.
Voice search البحث الصوتي
جوجل بيوفر لك خدمة صوتية للبحث عن طريق الميكروفون بدلاً من الكتابة وطبعًا ده بيوفر عليك وقت طويل في البحث.
Next/previous page الصفحة القادمة/ السابقة
بعد ما بتوصل لنتائج البحث بتكون على صفحات عشان تعدي من الصفحة الأولى للصفحة التانية بتضغط على next بس لازم تاخد بالك من نقطة مهمة وهي إنك كل ما بتبعد في عدد الصفحات كل ما العلاقة بنتائج البحث بتكون أبعد وغالبًا اللينك الأول بيكون أقرب نتيجة للبحث بتاعك.
Result type نوع البحث
طبعًا كلنا عارفين إن ممكن يكون البحث في الويب أو الصور، وممكن تختار فيديو، وممكن يكون بحثك عن خرائط، أو عن كتب.
كل دا جوجل بيوفره لك في شريط من فوق تحت مربع البحث مباشرة عشان يسهل عليك الوقت في البحث.
Quotes and Phrases الاقتباسات والعبارات
ودا من أهم السبل اللي ممكن تساعدك في شغل الترجمة، وهو إنك تبحث عن جملة بعينها عشان تقدر تعمل توطين وترجمة مناسبة، ودا بيكون من خلال إنك بتحط الجملة بين علامتين تنصيص “……..” ونتيجة البحث هتكون عن الجملة بأكملها.
الفرق بين خانة google search وخانة I’m feeling lucky
كلنا لما بنفتح موقع google بنلاقي مربع البحث اللي بنكتب فيه عادي، لكن بيبقى فيه خيار من اتنين:
- خيار اسمها google search.
- خيار تاني اسمه I’m feeling lucky.
كلنا عارفين يعني إيه google search زي ما اتكلمنا قبل كدة… طيب ايه بقى الخيار التاني دا؟؟
بدل ما نتيجة البحث تكون قائمة مواقع وروابط مختلفة، الخانة دي بتوصلك مباشرةً للموقع اللي بتبحث عنه، زي مثلا:
- لو كتبت في مربع البحث كلمه زي Microsoft مباشرةً يوصلك لموقع www.microsoft.com
- كتبت في مربع البحث nike مباشرةً يوصلك لموقع www.nike.com
- لو كتبت في مربع البحث كلمه wikipedia مباشرةً يوصلك لموقع www.wikipedia.org
طيب دا أهميته إيه أو إيه الفرق بينه وبين البحث العادي؟… ببساطة أنت ممكن تكون بتدور على حاجة في موقع بعينه، وبالتالي هيوفر عليك وقت كبير جداً عشان توصل للموقع المطلوب.
ازاي نركز على نقاط محددة في البحث؟
- لو محتاج تبحث عن كل كلمة في مربع البحث هتكتب حرف “و” “And”، وبالتالي كل كلمة في مربع البحث هتكون في اعتبار محركات البحث.
- لو بتبحث عن كلمة بعينها أو جملة بعينها على بعضها بتحطها بين أقواس تنصيص “…”، وبكدا كل كلمة بين الأقواس هتكون في اعتبار محركات البحث.
- لو بتبحث عن كلمة واحدة من بين حاجتين أو أكتر بتكتب “أو” “OR” يعني كلمة واحدة أو جملة واحدة من الاتنين هتكون في اعتبار محركات البحث.
- لو مش عاوز البحث يكون عن كلمة معينة اكتب “NOT”، وبكدا ولا كلمة من اللي كتبتها هتكون في اعتبار محركات البحث.
- لو بتبحث عن أرقام تتراوح بين كذا وكذا بتكتب الرقمين و محركات البحث هتبحث فيما يتراوح بينهم، يعني مثلا لو بتبحث عن كاميرا من سعر 2000 إلى 3000 هتكتب الرقمين دول.
- لو بتبحث عن صفحات لها علاقة بموقع معين بتكتب كلمة “RELATED” قبل الموقع اللي أنت عايزه، يعني مثلا لو بتبحث عن صفحة تخص موقع Facebook هتكتب related:facebook.com، وبالتالي نتائج البحث كلها هتكون في موقع الفيس بوك.
أسرار البحث عن الصور
ببساطة ازاي ابحث عن صور في جوجل؟… عندي ٣ اختيارات:
- إما تكتب images.google.com.
- تضغط على زر الصور images في الشريط اللي تحت مربع البحث.
- تكتب جنب كلمة البحث كلمة صور أو images أو pictures.
كمان فيه حاجة اسمها بحث متقدم ودا بتستخدمه لو لسة مش عارف توصل لنتيجة مرضية، وخيارات البحث المتقدم في الصور بتكون:
- حجم الصورة image size: بتختار حجم الصورة يعني ممكن تختار أي حجم أو تقدر تحدد حجم معين سواء كبير أو صغير.
- أبعاد الصورة Aspect ratio: ممكن تكون طويلة أو مربعة أو واسعة أو بانوراما.
- الألوان في الصورة colors in image: ممكن تختار الصورة تكون بأي ألوان أو تختار من دائرة الألوان أو تكون أبيض وأسود.
- نوع الصورة type of image: بتبحث عن صورة وجه face ولا صورة clip art ولا صورة line drawing.
- المنطقة region: ممكن تختار مكان الصورة جغرافياً، وبتختار من القائمة أي دولة عاوزها.
- موقع site or domain: ممكن تكتب لينك URL معين، زي .gov أو .org.
- نوع الملف file type: تقدر تتحكم في امتداد الصورة JPG – GIF – PNG – BMP – SVG – WEBP – or ICO.
- حقوق الاستخدام والنشر Usage Rights: قبل استخدام أي محتوى أو أي صورة لازم أتأكد إن صاحبها يسمح باستخدامك لها ولا مش بيسمح، وفي الحالة دي بيكون حاطط رخصة حقوق استخدام ودا عن طريق فلتر حقوق الاستخدام usage rights filter بواسطة موقع اسمه www.creativecommons.org
الفلتر بيشمل:
- صور بدون رخصة: جوجل بيحدد البحث في الصور اللي بدون رخصة يعني مجانية ومتاحة للجميع.
- صور متاحة للاستخدام أو المشاركة في نشاط غير ربحي زي الصور اللي بننشرها على الفيس بوك ومواقع التواصل الاجتماعي.
- صور متاحة للاستخدام أو المشاركة لكن في نشاط ربحي تجني من وراه فلوس.
- صور متاحة للاستخدام أو المشاركة، وكمان متاح تعدل عليها براحتك بس في نشاط غير ربحي.
- صور متاحة للاستخدام والمشاركة والتعديل لكن في نشاط ربحي تجني من وراه فلوس.
أسرار ترجمة جوجل Google translate
جوجل بعد ما قدمت كل الخدمات دي مكانش ينفع تهمل أهم خدمة ممكن تتقدم زي (الترجمة)، اكتبها في مربع البحث هتظهر لك شاشة فيها مربعين كبار مربع فيه اللغة اللي أنت عايز تترجم منها والمربع التاني اللغة اللي أنت بتترجم لها، وتقدر تختار أي لغتين في العالم كله.
مش بس كدة… فيه خدمة النطق ودي علامة المايك لما تدوس عليها بينطق الكلمة بنطقها الصحيح.
كل اللي فوق دا لو عايز تترجم كلمة أو جملة صغيرة، طيب لو عايز بقى تترجم مقال كامل؟
لما تضغط على اول لينك في البحث هتظهر شاشة تانية فيها أوبشنز للترجمة متطورة أكتر، فيه زرار مكتوب عليه documents تقدر تختار أي ملف word وترفعه وهو هيترجم بضغطة زر واحدة.
خد بالك من نقطة مهمة جدًا جوجل عامل زي الروبوت يعني لو أنت بتشتغل مترجم مينفعش تعتمد عليه اعتماد كلي، ولكن بيساعدك كتير في فك شفرات الترجمة.
وأخيرًا جوجل كدعم منها لمجتمع الترجمة والمترجمين عملت Google translate community عشان تساعدهم ينموا مهارة الترجمة ودا من خلال إنك بتختار أكتر لغات بتتقنها من ٢ لـ ٥ وبيظهر شاشة فيها اختيارين Translate – Validate وعلى حسب عدد الكلمات اللي أنت بتترجمها بتتضاف لك، ولو ترجمتك فعلًا ممتازة بتاخد بادج يا إما ستار أو كاس، ودا طبعا بيتحط في السي في بتاعك.
وبكدا نكون عرضنا جزء بسيط من أسرار جوجل نتمنى إنه يفيدك…