دليلك التعريفي بمنصات العمل الحر
مع شيوع استخدام الإنترنت في العشرين سنة اللي فاتوا، بدأ عالم الفريلانس أو العمل الحر على الإنترنت يتوسع، وبدأت ناس كتير جدا تتجه للعمل الحر كبديل للوظايف الحكومية أو الأعمال المحددة بوقت معين سواء دوام كلي أو جزئي.
ومع التوسع في عالم الفريلانس على الإنترنت ظهرت فكرة منصات العمل الحر اللي بقيت مكان آمن للحصول على وظيفة أو مشروع في الفريلانس.
في المقال دا هنتكلم عن كل ما يخص مواقع العمل الحر، وازاي نقدر نسجل عليها، وإيه هي أشهر منصات العمل الحر.
ما هي منصة العمل الحر للمستقلين؟
منصة العمل الحر هي عبارة عن موقع إلكتروني بيتيح للمستقلين (الفريلانسرز) إنهم يعرضوا خدماتهم اللي بيقدموها، وبيتيح للعملاء الإعلان عن الوظائف، وبالتالي يبقى سهل على الفريلانسر إنه يلاقي شغل، وفي نفس الوقت يبقى سهل على العميل إنه يلاقي فريلانسر يعمله الشغل بتاعه.
وبالتالي هدف منصة العمل الحر إنها تكون وسيط بين العميل والفريلانسر، واللي بتضمن للعميل إنه الشغل بتاعه يخلص في المدة المطلوبة، وكمان تضمن للفريلانسر حصوله على المقابل المادي اللي اتفق عليه مع العميل، وكل دا في مقابل نسبة بتاخدها المنصة من العمليات الناجحة بين العملاء والفريلانسرز.
بعد ما عرفنا إيه هي منصات العمل الحر، دلوقتي عاوزين نعرف المنصات دي بتشتغل ازاي وإيه هي الشروط والأحكام بتاعتها…
كيف تعمل منصات العمل الحر؟
زي ما قلنا إن موقع العمل الحر بيعتبر وجهة أساسية للعملاء والفريلانسرز، وبتتم عليه عمليات شغل كتير، وبالتالي ضروري جدا تكون عارف المواقع دي بتشتغل ازاي..
أغلب المنصات بتشتغل بنفس الطريقة والاختلاف ما بينهم بيكون بسيط، ودا بيتخلص في الآتي:
- ضمان الثقة والأمان بين العميل والفريلانسر، ودا بيكون من خلال إنها بتوفر لوحة تحكم لكل من العميل والفريلانسر، وبما إنها بتكون الوسيط بين الاتنين فبالتالي عمليات الدفع هتتم من خلالها.
بمعنى إن العميل هيحط فلوسه في الموقع، والموقع هو اللي هيسحب الفلوس دي ويبعتها للفريلانسر بعد ما يخلص الشغل، وطبعا الموقع بيبقى له نسبة في كل صفقة شغل تتم.
- فيه بعض المنصات بتعتمد سعر ثابت لكل عمليات الشغل اللي بتتم عليها، زي موقع خمسات اللي بيكون سعر كل مشروع فيه 5 دولار بس، ودا معناه إن المنصات دي بتسمح بالمشاريع الصغيرة بس اللي مش بتحتاج وقت كبير في إنجازها.
وفيه منصات تاني بتعتمد على فكرة المزاد في تحديد سعر المشاريع، ودا بيكون من خلال إن العميل بيعرض مشروع معين للشغل، وكل فريلانسر يقول السعر اللي عاوزه مقابل إنجاز المشروع، وبعد كدا العميل يختار واحد منهم.
- كل موقع من مواقع العمل الحر له طرق مختلفة في إرسال الأموال للفريلانسرز بعد ما يخلص الشغل، وبالتالي مهم جدا تكون عارف الطريقة اللي هتاخد بيها الفلوس بتاعتك من الموقع، ومن أشهر الطرق اللي المواقع بتستخدمها هي باي بال، وبايونيير، والحوالات البنكية.
- كل منصات العمل الحر لها شروط وقوانين خاصة بيها عشان تنظم الشغل بين العملاء والفريلانسرز، فمهم جدا تكون عارف الشروط والقوانين دي عشان تضمن حقك، وعشان الحساب بتاعك ميتقفلش لو خالفت القوانين دي.
- منصات العمل الحر بتتيح للمستخدمين بتوعها التواصل بينهم وبين بعض، ودا هيفيدك كفريلانسر إنك تفهم الشغل المطلوب منك كويس من خلال التواصل مع العميل قبل ما تبدأ فيه، وكمان تقدر تتابع مع العميل تطورات الشغل أول بأول.
- أغلب المنصات فيها إمكانية التقييم من العملاء، وبالتالي تقدر تاخد فيد باك من العميل بتاعك يساعدك إنك تشتغل مع عملاء أكتر؛ ودا لأن التقييم دا هيكون ظاهر لكل العملاء في المنصة.
اعرف ازاي تتجنب النصب في العمل الحر من المقال دا: تجنب النصب في العمل الحر | أهم النصائح والإرشادات
كيف أسجل في منصة العمل الحر؟
التعامل مع منصات العمل الحر بيكون سهل جدا والتسجيل فيها بيكون من خلال الموقع نفسه، بتسجل بياناتك كاملة وبيبقى عندك أكاونت على الموقع.
الأكاونت بتاعك تقدر تحط فيه الـ CV بتاعك وأعمالك السابقة، وسعر الخدمة اللي بتقدمها.
لازم يكون عندك أكاونت عشان تقدر تقدم على الوظايف الموجودة في الموقع، وبالتالي مهم جدا تهتم بالحساب بتاعك وتخليه في أفضل صورة عشان يجذب العميل إنه يشتغل معاك.
طيب إيه هي أفضل منصات العمل الحر اللي أقدر أسجل عليها؟…
قائمة بأفضل منصات العمل الحر على مستوى العالم وفي العالم العربي
لحسن الحظ فيه مواقع للعمل الحر كتيرة جدا، وكل واحد منها له مميزاته الخاصة بيه.
منصات العمل الحر العربية
فيه منصات عمل كتير جدا بتخدم عالمنا العربي، وبتتميز بسهولة التواصل مع العملاء اللي بتكون بلغتنا العربية، وكمان سهولة التعامل مع المنصات نفسها، ومن أشهرها…
- منصة العمل الحر خمسات (Khamsat)
ودي تعتبر أسهل المنصات العربية للعمل الحر، ومناسبة جدا للمبتدئين في عالم الفريلانس؛ ودا لأنها بتعتمد على المشاريع الصغيرة بأجر ثابت للمشروع يساوي 5 دولار.
التعامل على المنصة دي سهل جدا وبيوفرلك فرص شغل كتير.
اعرف أكتر عن منصة خمسات من المقال دا: موقع خمسات للعمل من المنزل | دليل المبتدئين
- منصة العمل الحر أريد (Ureed)
بتتميز المنصة دي إن أغلب المشاريع اللي فيها بتكون في مجال الكتابة والتحرير والترجمة، بجانب مشاريع تانية متعددة.
اعرف أكتر عن منصة أريد من المقال دا: منصة أريد للعمل الحر
- منصة العمل الحر تصميمي (Tasmeemme)
منصة بتجمع مبدعين كتير من مختلف الدول العربية، وتقدر تسجل فيها لو أنت بتشتغل في التصميم، سواء التصميم المعماري أو الجرافيكس والرسوم المتحركة.
- منصة العمل الحر مستقل (Mostaql)
واحدة من أشهر المنصات العربية على الإطلاق، فيها مشاريع كتير جدا في مجالات مختلفة، وأغلب الفريلانسرز اللي فيها من المحترفين، وبالتالي لا يُنصح إن المبتدئين يسجلوا فيها في بداية شغلهم.
اعرف أكتر عن منصة مستقل من المقال دا: شرح موقع مستقل للربح من الانترنت
منصات العمل الحر العالمية
بتتميز المنصات العالمية بإنك تقدر توصل لعملاء كتير من مختلف دول العالم، ودا بيتيح لك اكتساب خبرات أكتر بجانب الانفتاح على الثقافات المختلفة، والتعامل فيها بيكون بروفيشنال أكتر.
مهم جدا تهتم بالأكاونت بتاعك على المنصات دي وتطوره دايما، ودا لأن المنافسة على المنصات دي بتكون كبيرة، ومن أفضلها…
- منصة العمل الحر أب وورك (upwork)
ودي تعتبر أكبر منصة للعمل الحر على الإطلاق، وكمان هي الوجهة الأساسية لكل المحترفين على مستوى العالم، ودا بسبب الأسعار التنافسية للمشاريع بتاعتها بجانب السياسات والقوانين اللي بتضمنلك الحصول على كامل حقوقك بمجرد إنتهاءك من العمل.
اعرف أكتر عن التسجيل وكيفية القبول في موقع أب وورك من المقال دا: شرح موقع أب ورك UPWORK | كيفية التسجيل والقبول
اعرف أكتر عن التقديم على الوظايف في منصة أب وورك من المقال دا: شرح موقع أب ورك UPWORK | التقديم على الوظائف وحل المشكلات مع العميل
- منصة العمل الحر فايفر (fiverr)
واحدة من أفضل منصات العمل الحر العالمية، وأهم ما يميزها هي قلة الرسوم المفروضة على الفريلانسرز، ودا بيتيح لهم إنهم يشتغلوا عليها أكتر.
- منصة العمل الحر فريلانسر (freelancer)
من أشهر منصات العمل الحر اللي بتتميز بالسهولة في التعامل معاها، والأهم إنها بتضم عملاء كبار جدا زي شركات ميكروسوفت وإنتل.
اعرف أكتر عن منصة مستقل من المقال دا: شرح موقع FREELANCER وطريقة التسجيل فيه
وفي النهاية، لازم تبقى عارف أي منصة من منصات العمل الحر تناسب قدراتك ومستواك في الشغل عشان تضمن إنك تلاقي شغل بسرعة.
وافتكر دايما إن تعاملك الكويس مع العملاء والتزامك بالمواعيد والديدلاين، بجانب احترامك لقوانين المنصات هو اللي هيساهم في إنك تاخد تقييم كويس يساعدك في الحصول على عملاء أكتر.