شرح موقع مستقل للربح من الانترنت
في رحلة السعي لتحقيق الاستقرار المادي أو زيادة الدخل، بقى كتير من الناس يتجه للربح من الانترنت، ودا بيكون من خلال العمل الحر أو الفريلانس.
ومع تطور عالم الفريلانس أصبح فيه مواقع ومنصات كتير بتتيح للمستقلين (الفريلانسرز) إنهم يلاقوا فرص عمل من خلال توفير مكان يجمع بينهم وبين العملاء.
في المقال دا هنتكلم عن واحد من المواقع دي بشيء من التفصيل يساعدك تقدر تشتغل من خلاله بكل سهولة، وهو موقع مستقل للعمل الحر.
نبذة تعريفية لموقع مستقل
موقع مستقل من أهم مواقع العمل الحر في الوطن العربي اللي أصبح بيضم حاليا أكتر من 160 ألف فريلانسر.
الموقع كغيره من مواقع العمل الحر بيلعب دور حلقة الوصل بين أصحاب المشاريع والمستقلين من خلال تقديم المشاريع على الموقع، واختيار مستقلين لتنفيذها وبالتالي يقدروا يكسبوا من مهاراتهم.
الموقع يتجسد في تلات جهات:
- أصحاب المشاريع سواء أفراد أو شركات.
- المستقلين أصحاب المهارات اللي بينفذوا المشاريع.
- منصة العمل الحر اللي بتقوم بدور الوسيط بين الجهتين.
بيعرض أصحاب العمل المشاريع اللي محتاجين مستقلين ينفذوها، ويختاروا من المستقلين اللي شايفين إن خبرتهم هتساعدهم في تنفيذ مشروعاتهم.
أقسام موقع مستقل
الموقع بيضم مجالات كتير جدا للعمل الحر، وكل المجالات دي بتندرج تحت أقسام معينة، وهي:
- الترجمة والكتابة وتحرير النصوص.
- تصميم وأعمال فنية وإبداعية.
- برمجة، بناء وتطوير المواقع والتطبيقات.
- تدريب وتعليم عن بعد.
- التسويق الالكتروني والمبيعات.
- أعمال وخدمات استشارية وإدارية.
- دعم، مساعدة وإدخال بيانات.
- هندسة، عمارة وتصميم داخلي.
تقدر تختار القسم اللي المجال بتاعك بيندرج تحته، وتبدأ تسجل في الموقع وتكسب من مهارتك، بس لازم تكون عارف شروط استخدام الموقع وتتبعها عشان متتعرضش لمشكلة توقف حسابك تمامًا.
أهم شروط موقع مستقل
- عدم إنشاء أكتر من حساب، وإذا تعرض حسابك لمشكلة تابع مع فريق مستقل لحل المشكلة بدل من إنشاء حساب جديد.
- عدم استخدام أكتر من شخص لحسابك في مستقل.
- عمر المستخدم للموقع يكون أكتر من 18 سنة والموقع بيطلب وثائق تأكيد لهويتك وسنك.
- اسم المستخدم لازم يكون اسمه الحقيقي مش أسماء مستعارة أو شعارات ولا اسم خاص بعلامة تجارية، والنبذة الشخصية عنه تكون خالية من أي عبارات ترويجية لمشاريع أو شركات.
- الموقع بيضمن حقوق الطرفين في حالة التزامهم بالشروط، وإن الاتفاق بينهم يكون واضح من البداية.
- عدم التزامك بشروط استخدامك للموقع ممكن يعرضك لوقف حسابك وتجميد رصيدك اللي جمعته، وممكن يمنعك من استخدام الموقع تاني، وممكن كمان يعرضك للنصب وضياع رصيدك.
في موقع مستقل …لماذا يوجد لدي رصيد لا يمكن سحبه؟
الرصيد في مستقل أربعة أنواع:
- الرصيد الكلي: وهو كامل الرصيد الموجود في حسابك سواء القابل للسحب أو غير القابل للسحب.
- الرصيد المعلق: ودا الرصيد اللي حصلت عليه ولسة ممرش عليه 14 يوم وهي مدة التعليق قبل ما يكون الرصيد قابل للسحب.
- الرصيد القابل للسحب: وهو الرصيد اللي جاي من أرباح شغلك على المشاريع بعد مرور 14 يوم على استلام المبلغ في حسابك وتقدر تسحبه من خلال باي بال.
عمولة موقع مستقل
نسبة موقع مستقل عن كل مشروع بتنفذه بتكون 20% عن أول 500 دولار بتكسبهم، وتقدر تسحب فلوسك بعد مرور 14 يوم من دخولها لحسابك.
اعرف ازاي ممكن تحقق دخل ثابت من العمل الحر من المقال دا: أهم النصائح لتحقيق الدخل الثابت من العمل عن بعد
كيفية التسجيل في موقع مستقل
بيتم التسجيل على الموقع من خلال الرابط دا: التسجيل في موقع مستقل
التسجيل بيكون من خلال بريدك الإلكتروني وبعض بياناتك الشخصية، وبكدا يكون معاك حساب على موقع مستقل تقدر تقدم على المشاريع من خلاله.
ولكن خلي بالك فيه مجموعة نصايح مهمة حاول تتبعها وأنت بتعمل بروفايلك على مستقل عشان يبقى بروفيشينال، ومنها:
- استخدم اسمك الحقيقي على البروفايل بدون رموز أو أرقام.
- استخدم صورتك الشخصية وبلاش صور وهمية، ويفضل تكون صورة رسمية.
- النبذة الشخصية عن المستخدم لازم تكون بتعبر عنك وعن مهاراتك واستخدم فيها كلمات تميزك وتميز مهارتك عن باقي المستقلين.
- يستحسن تعمل فيديو وترفعه تبين فيه مؤهلاتك وتعرف نفسك.
- معرض الأعمال: جزء مهم جدا، بتقدر تضيف فيه نماذج لأعمالك السابقة، فاختار المميز منها والمتنوع واكتب أنجزت المشروع خلال كام يوم.
- اظهر مهاراتك وميزها، واكتب فيها مع كل مهارة عامة مهارة مميزة، وحاول تختار كلمات مفتاحية بيستخدمها أصحاب المشاريع للبحث عن مستقلين، زي مثلا الكتابة الطبية، وSEO.
- التقييمات: ودي مهمة جدا، فخليك حريص إن العملاء يضيفولك تقييم بعد كل مشروع؛ لأن دا بيقوي بروفايلك.
- خليك متواجد على الموقع وعلى اتصال سريع بالعملاء؛ لأن سرعة ردك وتواجدك على الموقع بيخلي العملاء يفضلوا العمل معاك ويرجعولك تاني في شغل جديد.
- بروفايلك على مواقع العمل الحر هي بابك المفتوح على شركات العمل، خلي مظهر بابك دايما مميز يلفت نظر أي عميل وخلي بابك دايما مفتوح لكل العملاء اللي في مجالك.
ودلوقتي بعد ما عملت البروفايل وعرفت الشروط، مهم تعرف تبحث عن الوظائف إزاي…
كيفية العمل في موقع مستقل
هتدخل على الموقع هتلاقي في الشريط فوق كلمة تصفح المشاريع هتضغط عليها… هتظهر لك الوظائف، وفي بعض الفلاتر اللي تقدر تستخدمها للوصول بسهولة للوظائف المناسبة ليك وتقدم عليها.
ودا هيكون عن طريق عدة اختيارات:
- تكتب كلمة مفتاحية شائعة في المشاريع اللي مهتم بيها.
- تختار التصنيف أو المجال اللي محتاج تبحث فيه.
- تحدد المهارات اللي عندك.
- تحدد المدة اللي تناسبك لتسليم المشروع.
- تحدد الميزانية المناسبة.
- تختار كمان طريقة عرض الوظائف (الأحدث – الأقدم –
الأقل عروضا – الأكثر عروضا).
مهم تختار الفلاتر بدقة لأنها بتقلل الاختيارات اللى قدامك وتخصصها أكتر عشان توصل للأنسب من الوظائف.
ودلوقتي نيجي للخطوة اللي بعد كدا وهي التقديم على المشاريع…
لازم تراعي إنك تقرأ المطلوب كويس جدا في المشروع وهل هتقدر تعمله ولا لا؛ لأن موقع مستقل بيسمح لك بالشغل على 10 مشاريع فقط في الشهر، عشان متفقدش فرصة مناسبة بسبب سوء الاختيار.
بتقدم العرض بتاعك وحاول تكتبه بطريقة واضحة ومنظمة وخالية من الأخطاء الإملائية والنحوية، خاصة في الوظائف اللي بتعتمد على المهارة دي لأنها بتدي انطباع أولي عنك.
ممكن تقسم العرض وأنت بتكتبه لأجزاء مثلا:
- جزء بتوضح فيه خبراتك السابقة المتناسبة مع المشروع اللي بتقدم عليه.
- جزء تاني بتوضح من خلاله فهمك للمطلوب في المشروع وكيفية إنجازه.
- جزء تالت توضح فيه المدة والميزانية المناسبة ليك لتنفيذ المشروع بشكل مبدئي ومرن؛ بحيث يكون فيه إمكانية للتفاوض مع صاحب المشروع بعد معرفة التفاصيل كاملة.
وكمان ممكن تقوله يشوف معرض الأعمال بتاعك لو حاطط فيه حجات شبه مشروعه، وطبعا تختم كلامك إنك هتبقي سعيد ولك شرف التعاون معاه.
التزامك بالنصائح دي هيساعدك بشكل كبير أن العرض بتاعك يتقبل وتستلم المشروع.
طيب الموقع ككل كويس في ايه ووحش في ايه؟؟
مميزات وعيوب موقع مستقل
المميزات
- سهولة استخدام الموقع والعمل عليه؛ فالموقع بسيط وتقدر بكل بساطة تشتغل عليه.
- سرعة استجابة المسئولين عنه لو حصلت أي مشكلة.
- وفرة المشاريع وتباينها؛ فهتلاقي فيه مشاريع طويلة المدى ومشاريع تاني قصيرة، وبميزانيات متفاوتة.
- قدرتك على اكتساب عميل دايم، ودا من خلال تعاملك الكويس مع أصحاب المشاريع، فلو قدمت عروض على المشاريع بتاعتهم بعد كدا نادرا ما هيختاروا حد غيرك.
العيوب
- أهم وأبرز عيب هو التنافس الشديد، ولكن دا سلاح ذو حدين لأنه ممكن يصيبك بالإحباط لو العميل مختاركش لتنفيذ المشروع، وممكن يخليك تشتغل على نقاط قوتك، وتدور على الأسباب اللي خلت العميل يختار حد تاني.
- التعاملات المادية عن طريق الباي بال بس، يعني مفيش أي طرق تاني للمعاملات المادية.
- متقدرش تعتمد عليه في تخصص معين لأنه منصة للعمل الحر بشكل عام.
اعرف أكتر عن باقي منصات العمل الحر من المقال دا: دليلك التعريفي بمنصات العمل الحر
دي كانت نظرة سريعة ومفصلة إلى حد ما عن موقع مستقل، أرجو إنها تكون مفيدة.