شرح موقع Freelancer وطريقة التسجيل فيه
مينفعش تدخل عالم الفريلانس من غير ما تعرف موقع فري لانسر اللي بيعتبر من أقدم مواقع العمل الحر وأكترها شهرة على الإطلاق.
هنتكلم في المقال دا عن شرح موقع Freelancer، وازاي تقدر تسجل فيه…
نبذة تعريفية
قبل ما نبدأ شرح موقع فري لانسر 2021 خلينا الأول نتعرف على الموقع دا بشكل عام.
موقع فريلانسر هو واحد من أهم مواقع العمل الحر الأجنبية اللي تم تأسيسه في أستراليا، واللي من خلاله تقدر تقدم على مئات الوظايف والمشاريع في المجالات المختلفة بشرط يكون عندك المهارة الكافية والاحترافية في العمل.
موقع فري لانسر بيهتم بالمشاريع الكبيرة طويلة الأمد، بس دا لا يمنع إنك ممكن تلاقي عليه شغل لمشاريع صغيرة وأعمال مش بتتطلب وقت كبير لتنفيذها.
الموقع أصبح بيضم حاليا أكتر من 53 مليون فريلانسر من أصحاب المواهب والكفاءات من مختلف أنحاء العالم، ووصلت شهرة الموقع والعمل عليه في حوالي 247 دولة حول العالم.
مجالات العمل في موقع Freelancer
مع وجود العدد الضخم دا من الفريلانسرز على الموقع نقدر نقول إن الموقع بيضم جميع المجالات اللي ممكن تخطر على بالك، وأهم المجالات دي هي…
مجالات البرمجة، وتكنولوجيا المعلومات وتطوير المواقع
وتشمل كل ما يخص العمل في الإنترنت وأساليب تطوير المواقع، زي استخدام برامج المحتوى المكتوب زي وورد بريس، بجانب هيكلة البرمجيات، والجافا سكريبت، وغيرها.
مجالات الكمبيوتر والهواتف الذكية
ودا يشمل المجالات الخاصة بإنشاء برامج الكومبيوتر وتحديثات السوفت وير، بجانب برمجة وتطوير أنظمة تشغيل الهواتف الذكية وتطوير التطبيقات الخاصة بيها زي أندرويد، ios، وغيرها.
مجالات كتابة المحتوى والتسويق الإلكتروني
وفيه كل ما يخص كتابة المحتوى سواء على المواقع الإلكترونية أو الكوبي رايتنج والحملات الإعلانية على السوشيال ميديا، أو من خلال جوجل أو الإيميلات.
مجال التصميم وتعديل الوسائط
بيضم كل الأعمال الخاصة بالتصميم سواء تصميم المواقع أو تصميم الشعارات أو الجرافكس، وكمان الفوتوشوب، وغيرها.
مجال إدخال البيانات
والمقصود بيه كل الشغل اللي بيعتمد على إدخال البيانات وتصنيفها وترتيبها، ويشمل الشغل على برامج الأوفيس زي الوورد والأكسيل وملفات الـ pdf، وغيرها.
مجالات الهندسة والعلوم
والقسم دا بيضم كل التخصصات الهندسية زي الهندسة المعمارية والمدنية والكهربائية وهندسة الاتصالات، بجانب العلوم الحيوية والفيزياء.
والتخصصات دي على الرغم إنها أكاديمية إلى حد ما إلا إنها مطلوبة بشكل كبير من الشركات والمصانع حول العالم، واللي ممكن تلاقي كتير منها بينزل وظايف على موقع فريلانسر.
مجالات النقل البري والبحري والشحن
تشمل جميع الأعمال الخاصة بالتوصيل والشحن سواء كانت برية أو بحرية، يعني هتلاقي شركات بتطلب عاملين في المجال دا.
إدارة الأعمال والمحاسبة والموارد البشرية
قسم بيشمل كل ما يخص إدارة الأعمال وإنشاء خطط المشاريع، ودراسات الجدوى بجانب المحاسبات والإدارة المالية، وغيرها.
الترجمة واللغات
مجال بيضم كل الأعمال الخاصة بالترجمة التحريرية والفورية وتعليم اللغات الأجنبية.
ودي كانت بعض المجالات اللي بتندرج تحتها مئات التخصصات اللي ممكن تلاقي لها وظايف على الموقع، وفي غيرها مجالات تانية لسة كتير.
ودا يبين لك قد إيه إن موقع زي فريلانسر للعمل الحر كبير جدا، ودا اللي كنا بنقوله من البداية.
اعرف أكتر عن باقي منصات العمل الحر من المقال دا: دليلك التعريفي بمنصات العمل الحر
ودلوقتي نيجي للجزء الأهم في مقالنا وهو طريقة التسجيل في موقع Freelancer…
طريقة التسجيل في موقع Freelancer
أول حاجة بتدخل على الصفحة الخاصة بالتسجيل على الموقع من خلال اللينك دا: التسجيل في موقع Freelancer
وبعد كدا تتبع الخطوات الجاية:
- هتدوس على كلمة sign up فوق على اليمين وهتظهرلك صفحة تانية.
- تقدر تكمل تسجيل من خلال الفيسبوك، ولكن يفضل تسجل بالبريد الالكتروني بتاعك وبتكتب كلمة سر تكون قوية وسهل عليك حفظها، يفضل كلمة السر يكون فيها حروف وأرقام. بعد كدا تدوس على (join freelancer).
- هتلاقي نفسك رحت على صفحة تاني، تكتب فيها الـ user name اللي عاوزه، وممكن تختار من جدول المقترحات، وبعدين تدوس next.
- الخطوة اللي بعد كدا هي اختيار إنك هتشتغل فريلانسر مش صاحب عمل.
- بعد كدا هتختار مهاراتك الأساسية اللي هتشتغل بيها وتختار معاها كمان المهارات الفرعية اللي بتخدم مهاراتك الأساسية، ودا بيكون من جدول كبير فيه 3 أعمدة بتملاهم.
لاحظ إنك ممكن تختار حوالي 20 مهارة مختلفة من مجالات عديدة. بعد كدا هتدوس على next step.
- وهنا مفترض تضيف بعض بياناتك الشخصية، زي اسمك، واللغة اللي حابب صفحتك تظهر بيها، بجانب مستوى مهاراتك، يعني إذا كنت مبتدئ أو متوسط أو محترف. بعد كدا دوس على next.
- وهنا تقدر تختار طريقة الدفع اللي هتستلم بيها أرباحك من الموقع، سواء باي بال أو حوالة على حسابك البنكي. بتحط كل بياناتك حسابك أي كان، وبكدا تكون ربطته بالموقع. ممكن تعمل الخطوة دي في وقت تاني لو لسة مش معاك حساب تقدر تستلم عليه فلوسك، ولكن دي خطوة مهمة لازت تحاول تعملها قبل ما تستلم أي أرباح قدر الإمكان.
- الخطوة اللي بعد كدا هي إنك تقدر تختار إذا كنت حابب عضويتك في الموقع تكون مدفوعة ولا لا، ودي خطوة اختيارية مش إجبارية.
العضوية المدفوعة بتديك أفضلية أكتر في إنك تقدم على وظايف والبروفايل بتاعك يظهر بشكل أفضل للعملاء، ودا بيكون في مقابل اشتراك شهري حوالي 10 دولار. ولكن دا مش معناه إنك مش هتقدر تقدم على وظايف لو مشتركتش، زي ما قلنا دي خطوة اختيارية.
وبكدا يكون حسابك اتعمل على موقع فريلانسر وتقدر تقدم على الوظايف بكل أريحية.
ولكن من الأفضل إنك تستكمل باقي إجراءات عمل الحساب بتاعك عشان تظهره للعملاء بشكل أفضل وأكتر احترافية، ودا بيكون من خلال التالي:
- التأكد من صحة البريد الإلكتروني وتفعيله، ودا بيكون من خلال رسالة هتلاقيها موجودة على الميل بتاعك.
- تأكد حسابك على الموقع من خلال رقم الموبايل وبعض البيانات التانية اللي ممكن تملاها، والاختيار دا هتلاقيه في الإعدادات (manage)، ودا عشان ترفع من درجة مصداقية حسابك.
نصائح مهمة لتعديل الملف الشخصي
طبعا لا يخفى عليك عزيزي القارئ إن البروفايل بتاعك بيمثل الواجهة بتاعتك عند العميل، وبالتالي لازم تهتم بيه جدا وتطلعه في أحسن صورة، ودي شوية نصايح هتساعدك تحسن من بروفايلك:
- خلي صورة البروفايل بتاعك رسمية.
- حط نبذة تعريفية عنك تكون مختصرة وشاملة لأهم نقاط قوتك ومميزاتك التنافسية.
- اهتم بالبورتفوليو بتاعك على الموقع وحط فيه أهم وأنجح الأعمال اللي عملتها قبل كدا، ويفضل تحدثه دايما بأعمالك الجديدة.
- لو عندك شهادات علمية أو دورات تدريبية خاصة بمجالك حطها خاصة لو كانت من أماكن مشهورة على مستوى العالم.
وبكدا نقدر نقول إن البروفايل بتاعك جاهز تماما للتقديم على الوظايف.
كل ما عليك إنك تبحث عن المشاريع الخاصة بمجالك وتبدأ تقدم عروضك التنافسية وتنتظر موافقة العميل عليها، وبعد كدا تبدأ شغل وتحقق الأرباح اللي نفسك فيها.