كلام في الفريلانس

موقع خمسات للعمل من المنزل | دليل المبتدئين

موقع خمسات واحد من المنصات العربية المشهورة للعمل الحر على الإنترنت، وهو تابع لشركة حسوب اللي بتمتلك منصة مستقل وغيرها من المواقع والمنصات.

الموقع بيتميز بتعدد الخدمات اللي موجودة فيه واللي بتسمح للفريلانسرز إنهم يلاقوا وظيفة أو مشروع يناسبهم.

هنتكلم في المقال دا عن كل ما يخص موقع خمسات عشان يبقى دليل ليك لو أنت مبتدئ وحبيت تشتغل عليه…

هل موقع خمسات موثوق؟

أعتقد إن أول سؤال جه في بالك أول ما سمعت عن الموقع هو: هل موقع خمسات مضمون؟ 

لازم تبقى عارف إن الموقع دا من أشهر المواقع العربية للعمل الحر، وعليه ملايين من المستخدمين اللي بيتعاملوا عليه يوميًّا من غير أي مشاكل سواء العملاء أو الفريلانسرز.

وبالتالي نقدر نقول إن موقع خمسات من المواقع الآمنة اللي تقدر تشتغل من خلالها، خاصة لو أنت مبتدئ.

الموقع بيتميز بإن المشاريع اللي بتكون عليه صغيرة إلى حد ما ومش بتتطلب وقت كبير، بجانب سهولة التعامل مع الموقع، وعشان كدا بنلاقي ناس كتير بتنصح بيه للمبتدئين.

اعرف أكتر عن منصات العمل الحر التانية من المقال دا: دليلك التعريفي بمنصات العمل الحر

كيفية التسجيل بموقع خمسات؟

زي ما قلنا إن موقع خمسات من المواقع السهلة جدا في التعامل معاها، وتقدر تسجل في الموقع من خلال اللينك دا : التسجيل في موقع خمسات

التسجيل بيكون بسيط عن طريق بريدك الإلكتروني وبعض بياناتك الشخصية، وبكدا يكون معاك حساب على موقع خمسات تقدر تعرض الخدمات اللي بتقدمها من خلاله.

أقسام العمل في موقع خمسات

مجالات الشغل في الموقع عديدة وتقدر تحط الخدمة بتاعتك في القسم المناسب ليها.

الموقع بيحتوي على 9 أقسام، وهي:

قسم الأعمال

القسم دا بيشمل كل ما يخص البيزنس، زي دراسة الجدوى، وإنشاء خطط الأعمال، وحسابات التكلفة، وغيرها.

وبالتالي تقدر تحط خدمتك في القسم دا لو عندك خبرة في مجال إدارة الأعمال.

قسم الاستشارات والنصائح

القسم دا مخصص لتقديم الاستشارات والنصايح في العديد من المجالات.

يعني لو عندك خبرة في مجال البيزنس والشركات وتقدر تقدم استشارات ونصايح لرجال الأعمال، فالقسم دا هيكون مناسب جدا لعرض خدمتك فيه.

قسم التسويق الإلكتروني

ودا بيشمل كل أعمال التسويق الإلكتروني المختلفة سواء التسويق على السوشيال ميديا أو إدارة الحملات الإعلانية الإلكترونية والإعلان في جوجل، وغيرها من خدمات التسويق.

لو أنت كوبي رايتر شاطر وعندك خبرة في مجال التسويق الإلكتروني، فالقسم دا هو المناسب بالنسبة لك.

قسم التدريب عن بعد

القسم دا بيضم خدمات التدريب عن بعد زي تعليم المهارات المختلفة وكيفية التعامل مع التطبيقات والبرامج، وغيرها من خدمات التعليم الإلكتروني.

لو عندك خبرة في مجال التدريب والتعليم الإلكتروني، تقدر تحط خدماتك في القسم دا وتوضح إيه هي الدورات التدريبية اللي بتقدمها.

قسم البرمجة والتطوير

هنا هتلاقي كل ما يخص البرمجة وتطوير المواقع والتطبيقات وبرامج الكمبيوتر وبرمجة الألعاب وغيره، وبالتالي القسم دا خاص للمبرمجين.

قسم التصميم

لو أنت شاطر في الفوتوشوب وتصميم الصور والشعارات أو حتى الجرافيكس والرسوم المتحركة، يبقى تحط خدماتك في القسم دا.

قسم التقنية

قسم خاص بالخدمات التقنية زي تطوير المواقع والتطبيقات، وإصلاح المشكلات التقنية فيها، بجانب أدوات إدارة المحتوى على المواقع زي وورد بريس.

قسم الكتابة والترجمة

بيضم خدمات كتابة المحتوى والتدقيق اللغوي والتحرير، بجانب خدمات الترجمة من وإلى العديد من اللغات المختلفة.

قسم الخدمات المتنوعة

لو الخدمات اللي بتقدمها مختلفة عن الأقسام السابقة فتقدر تحطها في القسم دا.

شرح كيفية العمل بموقع خمسات

مبدأيًّا لازم تكون ماهر في الخدمة اللي هتقدمها على الموقع؛ ودا لأن المنافسة بين الفريلانسرز بتكون كبيرة.

مهم كمان تكون بتعرف تسوق لنفسك وللخدمة اللي بتقدمها كويس عشان تقدر تجذب أكبر عدد من العملاء.

أول ما تخلص التسجيل على الموقع وتفتح الأكاونت بتاعك تقدر تبدأ في عرض خدماتك من خلال إنك تدوس على خانة: [ أضف خدمة جديدة ].

بعد كدا هتحط اسم الخدمة بتاعتك، وهي تابعة لأي قسم من الأقسام اللي ذكرناها، وبعدين هتكتب نبذة تعريفية بسيطة عن الخدمة اللي بتقدمها، وممكن كمان تحط صورة أو فيديو يعبر عن الخدمة بتاعتك. كمان هتكتب مدة التسليم اللي هتقدر تسلم فيها الشغل.

يفضل إنك تكتب البيانات دي باللغة العربية الفصحى، ومهم إنك تتجنب الأخطاء الإملائية في الكتابة.

أما بالنسبة لأسعار الخدمات، فمن المعروف إن موقع خمسات بيتيح لك عرض خدماتك في مقابل 5 دولار للخدمة، ولكن تقدر تضيف تطويرات للخدمة بتاعتك بأسعار أعلى من كدا.

يعني على سبيل المثال، لو أنت كاتب محتوى وحددت إنك بتكتب عدد معين من الصفحات أو الكلمات مقابل 5 دولار، فأنت تقدر تضيف تطوير للخدمة دي بإنك ترفع المقالات بتاعتك على الموقع بتاع العميل بسعر إضافي، وبكدا يكون سعر الخدمة بتاعتك ككل أكتر من 5 دولار.

ما هي طرق الدفع في موقع خمسات؟

لو أنت عميل وحابب تشتري خدمة من موقع خمسات أو لو كنت فريلانسر وحابب تشتري خدمة من حد تاني فتقدر تحول الفلوس للموقع من خلال الفيزا أو الماستر كارد، وممكن كمان عن طريق باي بال أو حتى من خلال رصيدك على الموقع.

ما هي طريقة سحب الأرباح من الموقع؟

تقدر تسحب الأرباح بتاعتك على الموقع من خلال حساب باي بال الخاص بيك.

لاحظ كمان إن عمولة موقع خمسات بتكون 20% يعني 1 دولار لكل 5 دولار تكسبها من إتمام المشاريع المختلفة، وتقدر تسحب الفلوس بعد أسبوعين من استلامك للأرباح، ودي بيعتبرها البعض من عيوب موقع خمسات.

الحد الأدنى للسحب هو 10 دولار، يعني تقدر تسحب الأرباح بتاعتك بعد ما يوصل رصيدك على الموقع 10 دولار فأكثر.

اعرف ازاي ممكن تسحب فلوسك من العمل الحر من المقال دا: ازاي تقبض فلوسك من العمل الحر

وفي النهاية عزيزي القارئ، لازم تتحلى بالصبر لأن الحصول على أول عميل في منصات العمل الحر ممكن يكون صعب شوية، ولكن مع تطويرك في الحساب بتاعك وقدرتك على التسويق لنفسك هتلاقي الأمور أسهل.