التصنيف: الإدارة المالية
نظرية مثلث الثراء | الضلع الأول
أعتقد كلنا متفقين إننا لازم نسعى ونجتهد عشان نحصل على دخل كويس يساعدنا إننا نعيش حياة سعيدة ومستقرة… أكترنا بيمشي في الحلقة الكلاسيكية: إنه يتعلم ويدخل كلية “قمة” عشان يلاقي وظيفة حلوة لما يتخرج وبعدين يحاول يحوش ويحوش ويحوش عشان يعمله مشروع.
يمكن الكلام ده كان صح من 20 أو 30 سنة فاتوا، لكن حاليا اسمحلي أقولك إن السكة دي بقت expired ونتائجها بقت مش مضمونة إطلاقا…
طيب هو في طريق تاني أصلا؟؟
الإجابة آه… دلوقتي في طرق كتير أسرع ومواكبة أكتر لتطورات العصر…
دان لوك ابتكر طريقة حلوة ترتبلك أولوياتك، وده اللي هو عمله عشان يكون من أنجح رجال الأعمال وسمى الطريقة دي مثلث الثراء، في المقال دا هنعرفك أكتر عن الطريقة دي عشان توصل للاكتفاء المادي…
ما المقصود بنظرية مثلث الثراء؟
باختصار، دان لوك بيقولك عشان توصل لدرجة نجاح عالية في الجانب المادي لازم تمشي على الثلاثة أضلاع بتوع مثلث الثراء بالترتيب، وهم:
- اكتساب مهارات تجيب فلوس.
- بداية مشروع أو business يكون أساسه ال skill set بتاعتك.
- الاستثمار.
خلينا في المقال ده نتكلم بس على الخطوة رقم واحد، وهي اكتساب المهارة…
الضلع الأول | اكتساب المهارة
هنلاحظ هنا إنه مذكرش وظايف خالص؛ وده لأن الوظيفة معناها إن مديرك أو الجهة اللي مشغلاك هي اللي بتحدد قيمتك ومرتبك، واللي هيبقى من الصعب جدا إنك ترفعه، ولو قدرت ترفعه هيبقى حاجة بسيطة جدا.
ولكن لو أنت عندك مهارة، أنت اللي هتحدد قيمتك في السوق، وأنت اللي هتحدد سعرك، وهتقدر ترفع من قيمتك كل ما تشتغل على نفسك أكتر وترفع من الكواليتي بتاعتك وتتعلم تماركت لنفسك صح.
التطبيق العملي للكلام ده هو عبر دخولك سكة الـ Freelance… فريلانس يعني أنت لازم تتعلم مهارة وتحترف فيها وتبدأ تدخل المجال، مع ميزة إنك قاعد في بيتك على اللاب أو الموبايل بتاعك، معاك وقتك ومحدش بيتحكم فيك، والأهم بدون روتين ممل.
اعرف أكتر عن الفريلانس من المقال دا: دليلك الشامل لدخول مجال العمل الحر
طيب لو نجحت في كدة، خلاص أشتغل على الضلع التاني على طول؟
لأ… الخطوة اللي بعد كدة إنك تثبت نفسك أكتر وأكتر في السوق، وده عن طريق التطوير المستمر وإضافة مهارات إضافية للـ skill set اللي عندك…
طيب إيه هي أفضل المهارات المتاحة؟؟ وهل كونك طبيب أو صيدلي بيديلك advantage في بعض منها؟؟ وإيه الشروط اللي لازم تتوفر في المهارات الإضافية اللي هزودها عندي؟؟
مهارة التسويق هي طريقك السحري للاستفادة من باقي المهارات
قلنا قبل كدا إن أول خطوة للوصول للوضع المادي اللي بتحلم بيه هي إنك تكتسب مهارات؛ لأنك كل ما هتطور نفسك فيها وهتقدم value أعلى في الماركت، كل ما تقدر ترفع سعرك وهتلاقي الشخص اللي في أمس الحاجة لل value بتاعتك، ودا عكس الوظيفة التقليدية اللي حتى لو كان راتبك فيها عالي، هيفضل ليك سقف من الصعب جدا إنك تتخطاه…
طيب إيه الدليل على صحة الكلام ده؟ هنقربلك الفكرة بمثال صغير وبسيط، لو فيه واحد شغال صبي نقاش، ده بياخد يومية ١٠٠ جنيه وأكتر، وده معناه إنه بيدخل في الشهر أكتر من مرتبي في الوظيفة اللي كلية “القمة” جابتهالي، مع فارق بسيط، إنه أصغر مني ب ٦ سنين… طب ليه؟ لأن الولد اتعلم “مهارة” النقاشة واتمكن منها، واللي عايزه هيدفعله…
خلينا نبدأ بالمهارة اللي تقريبا تعتبر شرط أساسي وقاعدة تكمل أي مهارة تانية، وهي التسويق…
زي ما قلنا، لو معاك مهارات الدنيا كلها بس مش بتماركت لنفسك صح، للأسف مش هتقدر توصل للناس اللي محتاجة ال value اللي بتقدمها، بجانب إنها هي لوحدها تقدر تجيب بيها فلوس وأكتر فلوس كمان.
إزاي؟… دلوقتي لو أنت معاك بطيخة، لو انت شخص بتعرف في التسويق، هتوصل للفئة اللي محتاجة البطيخ، وهتعرض عليهم البطيخ.. إيه اللي هيخليهم ما يشتروش؟؟
طيب، حلو جدا… دلوقتي بعد ما عرفنا أهمية الmarketing، ازاي أكتسب المهارات؟؟
الأول أنصحك إنك تتفرج ع الكورس المجاني ده:
https://www.coursera.org/learn/learning-how-to-learn
طرق اكتساب المهارات
ركز هنا بقى، عشان تكتسب أي مهارة قدامك طريقين، وهما…
علم نفسك بنفسك
يعني تروح تدور على جوجل، وهتلاقي حجات كتير جدا، أو عندك الـ YouTube، واكتب how to learn كذا كذا.. وأنت هتغرق في فيديوهات التعليم، عيب الطريقة دي إنك هتستغرق وقت طويل عشان تلاقي محتوى قيم يعلمك، والعيب الأخطر إنك لما تيجي تخش المجال هتلاقي عقبات مكنتش تتوقعها بالتعليم النظري، فتغلط، وبالتالي ممكن تفقد الثقة وتتنازل عن هدفك.
اسأل مجرب
الطريقة الثانية، وهي الطريقة الأقصر، واللي مفيهاش لف ودوران كتير، وهي إنك تدور على Mentor، وهو شخص خبير في المجال اللي أنت قررت تتعلمه، وعدى بكل مراحل الفشل اللي تتخيلها، وتخطاها، عارف الـ tricks والخبايا، فده هيوفر عليك كتير…
وهو دا الشخص اللي تحاول تاخد معاه كورس، أو ورشة أو معسكر تدريب، أو ندوة، أي حاجة…
أنت هتلتصق بالـ mentor ده، هتتابع كل إنتاجه، بوستاته، وفيديوهاته، لو لقيت إنه تمام يبقى مبروك عليك لقيت الشخص المناسب، التحق بأي تدريب هيقدمه…
بالطريقة دي أنت ضمنت إنك مشيت في السكة الصح لاكتساب المهارة، عشان متعملش زي اللي كان عايز يقطع شجرة بسكينة، مجابتش نتيجة، راح قعد يسن السكينة، برضو مجبتش نتيجة، راح جاب منشار… اتهلك من التعب، راح جاب منشار كهربائي، وأخيرا قدر يقطع الشجرة… وبعد ما خلص… اكتشف أنه كان بيقطع الشجرة الغلط….
أمثلة على بعض أهم المهارات | الكتابة والترجمة
بعد ما عرفنا إن الـ Marketing هو المهارة الأساسية أو الـ”بيز” اللي كدة كدة لازم هتبدأ تاخد عنها فكرة بالتوازي مع المهارة اللي نويت إنك تحترفها، وعرفنا إيه هي أفضل طريقة لتعلم واكتساب أي مهارة… خلينا نضرب أمثلة لاتنين من أهم المهارات في عالم الفريلانس، وهما الكتابة والترجمة.
مهارة الكتابة
ليه المهارة دي مهمة؟
احنا اتكلمنا عن الماركتينج وأهمية الماركتينج، وقلنا إنك من غيره ممكن تكون متمكن جدا من مهارتك (الضلع الأول من المثلث)، لكن للأسف مش بتعرف تسوق لنفسك، مش قادر تحط نفسك قدام اللي محتاجك، طب هتنجح ازاي؟!
كمان لما هنتكلم في الضلع التاني من مثلث الثراء، وهو الـ Scalable Business هنعرف إن من غير ماركتينج، هيتحكم على البزنس بتاعك بالفشل. اللي عايز أقوله بقى إن من أهم وأقوى وسائل الماركتينج ده هو مهارة الكتابة أو تحديدا الـ Copywriting، اللي هو يعني الكتابة الإعلانية…
طيب ليه؟؟… الماركتينج ده بحر وعلم كبير، لكن أقوى أساليبه إنه يكون في حاجة مكتوبة بتوضح إيه هو المنتج أو إيه هي الخدمة اللي حضرتك بتقدمها…
أي شركة أو مؤسسة دلوقتي لازم بيكون ليها موقع وصفحة على الفيسبوك، مين اللي بيكتب البوستات بتاعة الصفحة دي؟؟ مين هيكتب المحتوى اللي يجذبك للموقع أو الصفحة؟؟ منين أنت هتعرف مواصفات وتفاصيل المنتج أو الخدمة أو المنحة أو الكورس؟؟
اللي بيكتب الحجات دي اسمه Copywrier، وبيكسب فلوس كتير لأنه أساس نجاح أي business، أو نجاحه هو شخصيا في تقديم خدمته لأي حد…
فيه برضو الـ Content Writer، وده هو اللي بيكتب المحتوى عموما سواء دعائي أو لأ…
نفس القصة بالضبط، برضو من غيره الموقع هيقع، من غيره الصفحة ملهاش لازمة، فكر للحظة لو صفحة بوستاتها مش مفيدة، أو موقع مش بتلاقي فيه مواضيع كويسة أو مهمة، هتكمل فيه ليه؟؟
كتابة المحتوى بالذات أنت كواحد من المجال الطبي ليك advantage فيها.. إشمعنى؟؟ لأن إنت الأكثر كفاءة طبعا إنك تكتب المحتوى في أي موقع أو صفحة أو كيان طبي.. مين هيكتب المواضيع عن الأمراض أو الأدوية أو الفسيولوجي أو الكيمياء أو أو أو!!
وحتى لو كتبها حد مش متخصص لازم هيحتاجوك كـ reviewer، عشان الكلام يكون authentic؛
فالناس بتوفر على نفسها وتجيب حد SME أو Subject matter expert (المختص اللي هو أنت) هو اللي يكتب الكونتنت…
كمان خلي بالك إن الكونتنت أنواع، يعني فيه المكتوب، أو المسموع -زي الـ podcast- أو مرئي… كل الأنواع دي أساسها script اللي كاتبه الـ writer…
أخيرا عايز أقول إن Dan lok مبتكر نظرية مثلث الثراء كانت مهارة الـ Copywriting هي الأساس بتاعه، وكانت أول مهارة في الـ skill set بتاعته.
مهارة الترجمة الطبية
مهارة الترجمة الطبية تعتبر من أفضل المهارات اللي ممكن تبتدي بيها؛ وده لأنها في ملعبنا بصفة مباشرة… يعني أنت بيطّلب منك إنك تترجم تقرير طبي أو نشرات أدوية أو حملات صحية توعوية مثلا، وبالتالي أنت كطبيب أو صيدلي مش هتحتاج غير إن لغتيك العربية والإنجليزية تبقى كويسة وتنقل فهمك للحجات دي إلى اللغة التانية.
بجانب اللغة، هتحتاج تتعلم شوية مهارات تانية بسيطة زي الشغل ببرامج CAT tools ودي عبارة عن برامج بتسهل جدا شغلك كمترجم وتوفر عليك الكثير من الوقت والمجهود…
قاعدة مهمة في مثلث الثراء
بعد لما تتمكن من المهارة، وتثبت نفسك فيها، مش على طول هتبدأ المرحلة التانية، وإنما أنت هتبتدي تكتسب حاجة اسمها skill set، ودي عبارة عن مجموعة من المهارات التانية اللي ليها نفس الـ Core بتاع مهارتك الأساسية، برضو هتبتدي تتعلمهم وتطّور فيهم، وبالتالي هيخدّمو على بعض، ويميزوك أكتر، ويوسعوا الماركت بتاعك؛ لأنك بكدا هتكون بتقدم لعملائك تجربة متكاملة.
ده اللي هنلاحظه بوضوح في الترجمة الطبية ومهارة كتابة المحتوى الطبي؛ المهارتين ليهم نفس الـ Core، اللي هو تمكنك من اللغة + صياغة متماسكة + أساسيات برامج الميكروسوفت البسيطة.
الصح إنك هتبتدي في مجال واحد بس لحد ما تحترفه، وبعدين هتبتدي تكمل وتثري ال skill set بتاعتك بالمهارات التانية.
من المهارات المناسبة برضو إنك تضيفها للـ skill set بتاعتك، واللي كتير من عملاء الترجمة بعد لما تسلمهم الملف المترجم لازم يبعتوا الملف لحد متخصص فيها، هي مهارة النشر المكتبي أو الـ DTP، ودي مجموعة من البرامج اللي من خلالها هتقدر تخلي الملفات المترجمة أو أي ملفات مكتوبة عموما في صورة قابلة للطباعة والنشر، وإنت كمان اللي بتظبط التصميم المناسب للإعلانات والفلايرز والبروشورز، وتنسق الصور والأشكال التوضيحية اللي فيها.
وبكدا نكون قدمنا لك شرح تفصيلي عن الضلع الأول من مثلث الثراء، كل ما عليك دلوقتي إنك تسارع لاكتساب مهارة معينة شايف نفسك فيها، وتبدأ تطورها وتنميها عشان تبدأ طريق نجاحك المادي.
شوف المقال اللي بيتكلم عن الضلع التاني والتالت في المثلث من اللينك دا: نظرية مثلث الثراء | الضلع الثاني والثالث، ونماذج حية للنجاح
التوعية المالية | طريقك لحياة أفضل!
سمعت قبل كدا عن مصطلح التوعية المالية؟
أو فكرت حياتك هتبقى عاملة إزاي عند تنفيذ المصطلح ده فعليًا؟
طب حلمت بالاستقلالية المادية اللي هتساعدك في تحقيق جميع أحلامك وطموحاتك؟
لو أول مرة تسمع المصطلح ده، يبقى لازم تقرأ المقال ده عشان تتعرف على أهم مبادئ التوعية المالية وكيفية تحقيقها.
مبادئ التوعية المالية
كتير من الناس بيعتقدوا أن الثراء هو امتلاك فلوس كتير، لكن الحقيقة أن الثراء الفعلي بيكون في طريقة تفكير الفرد اللي بتقوده إلى الثراء الحقيقي وهو معرفة طرق الكسب الفعال والوصول إلى الحرية الماليةز ومن أهم المبادئ اللي هتساعدك:
1.تشتري إيه؟
في نوعين من الأشياء اللي ممكن الفرد يشتريها:
النوع الأول: الAssets. ودي حاجات بتدخلنا مكسب.
النوع الثاني: الLiabilities. ودي حاجات ممكن نكون محتاجين لها، لكنها بتتطلب منا إنفاق عليها، وبالتالي هي مش سبب في أي دخل إضافي.
عادة ما يشتري الأغنياء النوع الأول عشان يقدروا يستثمروا فلوسهم ويحققوا مكسب أكبر، لكن الفقراء غالبًا بيشتروا النوع الثاني وبالتالي الفلوس اللي معاهم هتخلص ويصبحوا غير قادرين على تعويضها.
فنلاقي إن الفقير أول ما يتوفر معاه الفلوس، يشتري شقة أوسع، أما الغني يشتري شقة ويأجرها لشخص تاني، الشقة الأوسع هتكلف الفقير أكتر وأكتر (liability) ومش هتزود أي مكسب، لكن الشقة الإيجار (ِAsset) هتكون مصدر دخل إضافي للغني (Consistent income source)، وخلال عدد معين من السنين هيتوفر مع الغني فلوس زيادة يقدر يشتري بيها حاجة تانية توفر له مكسب تاني.
عشان كدا لازم تغير طريقة تفكيرك عند الشراء، اشتري فقط ما تحتاج إليه واللي متقدرش تعيش من غيره، وفي نفس الوقت حاول تستثمر فلوسك في أشياء من النوع الأول تساعدك على جلب مكاسب أكبر.
2. استثمر في نفسك
لازم تتعلم إزاي تستثمر في نفسك كويس سواء بتعليم نفسك مهارة جديدة تساعدك على إضافة دخل مادي لحياتك، أو تطوير نفسك في مجالك الأساسي بإنك تدرس دبلومة جديدة أو كورس جديد يزود معلوماتك وخبراتك، وبالتالي تقدر تحصل على عمل أفضل ودخل أعلى.
فممكن نلاقي الفقير أول ما يتوفر معاه الفلوس، بيبدأ بإنفاقه على احتياجاته الشخصية، زي: شراء موبايل غالي أو توفير رفاهيات أكتر له، أما الغني لما يتوفر معاه الفلوس بيفكر يستثمرها في نفسه ويدرس أكتر ويتعلم مهارات تناسب تطور السوق والعالم ويتدرب عليها ويتقنها، عشان يستغل ده في إنه يعرف يحقق قدر أكبر من الفلوس.
وبالتالي، مع مرور الوقت الفقير هيفضل زي ما هو لإن قدرته على جلب الدخل (Income capacity) لحياته ثابتة ويمكن مع زيادة الإنفاق الفلوس تقل أكتر، أما المهارة الجديدة هتحول الغني نفسه لـمصدر دخل متجدد باستمرار (Independent money generating machine).
3. أحسن استغلال وقتك
الفقير لما هيتوفر معاه الفلوس والوقت، بيفكر أكتر في رفاهيات زيادة وقضاء بعض الأوقات في الخروج والاستمتاع (فمثلًا: هيفكر يتفرج على فيلم ويتغدى مع أصحابه في مطعم أو يقضوا وقت في كافيه) وبالتالي بيهدر وقت ومال أكتر، لكن الغني بيستغل الوقت الزيادة اللي عنده في استثمار نفسه، فممكن يدرس معادلة أو ماستر أو بورد، أو يشترك في كورس إنجليزي أو سوفت سكيلز عشان يبقى مستعد للفرصة لما تيجي.
4. استثمر مالك في مشروع أو عقارات
الغني دايمًا بيفكر إنه يفتح مشروع جديد حتى لو كان صغير، المهم عنده إنه يستثمر الفلوس اللي معاه بأشكال مختلفة، لكن الفقير بيدور على أشياء تريحه أكتر، زيًا: لو الفقير وفر مبلغ من الفلوس ممكن يشتري عربية جديدة (liability)، لكن الغني هيستغنى مؤقتًا عن العربية ويعتمد على وسائل المواصلات بشكل أكبر، ويحاول يستغل الفلوس اللي معاه في إنه يفتح مشروع جديد، زي: صيدلية أو سوبر ماركت أو محل أجهزة أو يشتري وحدة عقارية، وبالتالي ثمنها هيزيد مع الوقت وتبقى (ِAsset).
وبكدا هنلاقي إن جميع مبادئ التوعية المالية بتعتمد أساسًا على تغيير طريقة تفكيرك في استغلال فلوسك ووقتك ونفسك، وإزاي تقدر تستثمرهم لتحقيق أفضل مستوى معيشة لك.
اقرا عن مثلث الثراء وازاي توصل للحرية المالية من المقال دا: نظرية مثلث الثراء | الضلع الأول
كيف تحقق مبادئ التوعية المالية؟
كل فرد في العالم عنده أحلام معينة بيحلم يحققها ويستمتع بيها، ومن أهم الأحلام اللي أغلب الناس نفسها تحققها إنها تملك فلوس كتير جدًا فتحقق لها الاستقلالية والحرية المالية.
لكن عشان نقدر نحقق ده، لازم نضع أهداف حقيقة ومحددة أمام أعيننا، وبالتالي يسهل تنفيذها في وقت زمني محدد، فلو كان هدفك تحقيق أكبر قدر من الفلوس، لازم تبقى فاهم أنت محتاج الفلوس ديه في إيه، وهتعمل إيه بيها، وهتشتري بيها (Assets ولا Liabilities)؟ وقتها بس هتقدر تضع خطة واضحة وسهلة التنفيذ وبزمن محدد.
فوضع خطة محددة هيساعدك على تحديد (Daily income goal) or (DIG)، وهو المبلغ المطلوب منك تحقيقه يوميًا عشان توصل لهدفك الأكبر.
مثال: لو افترضنا إنك محتاج تشتري شقة معينة بمبلغ كبير، هتجيب ورقة وقلم وتبدأ تكتب قدام عينيك المبلغ ده وأنت محتاج تشتريها خلال قد إيه من الوقت، وتبدأ تحسب أنت محتاج توفر مبلغ قد إيه في السنة، وقد إيه في الشهر، وقد إيه في الأسبوع، وقد إيه في اليوم وده هو (DIG) بتاعك والمطلوب منك تحقيقه يوميًا.
بعد الخطوة ديه، الهدف بتاعك هيبقى واضح في دماغك وقدام عينك وهتقدر تحدد حجم المجهود اللي محتاج تبذله عشان تحققه بسهولة، وهتفكر كويس قبل تضييع أي وقت أو مجهود مش بيقربك من هدفك و(DIG) بتاعك.
ووقتها هتكتشف أن الـ DIG مش هيتحقق بمجرد إنك تشتغل أكتر من الأول وأنت بتمارس نفس روتين حياتك، وهتكتشف إن علشان تقرب من DIG لازم تقدم قيمة حقيقية تستاهل إنه يدفعلك عليها فلوس أكتر وده غالبًا لا يمكن يتحقق بدون اكتساب مهارات جديدة.
حاول تحدد هدفك بوضوح وتكتبه في ورقة وتخليه دايمًا قدام عنيك عشان كل يوم تجدد أملك وطاقتك لتنفيذه، وخلي دايمًا في بالك القاعدة المشهورة اللي بتقول:
“Wherever your attention goes ,energy flows and results show”
المهارات اللازمة لتحقيق الحرية المالية
أكيد حلمت قبل كدا بأنك تبقى مليونير، معاك فلوس كتيرة جدًا ما تقدرش تعدها وتقدر بيها تشتري كل اللي نفسك فيه وتساعدك على تحقيق جميع أحلامك وطموحاتك. لكن هل فكرت إزاي هتوصل لكدا أو وضعت خطة واضحة من أجل تحقيقه؟
اقرأ السطور الجاية عشان تعرف إزاي تقدر تغير طريقة تفكيرك من أجل تحقيق حلمك.
في البداية لازم تعرف أن المليونير هو اللي بيقدر يعمل دخل مليون جنية سنويًا، وأيضًا قادر على إنه يعيش حياته بالشكل المناسب من غير ضغوطات أو أزمات، لإن في النهاية الفلوس هي مجرد وسيلة للوصول إلى الأهداف وتحقيق الرفاهية والحياة السعيدة.
وعشان تقدر تحقق المعادلة ديه وتبقى مليونير، محتاج 3 أشياء رئيسية تكون عندك بجانب السعي والإرادة والتوكل على الله وحسن الظن به.
1.التحلي بعقلية المليونير(Millionaire Mindset)
لازم يكون عندك مجموعة من المعتقدات وطرق التفكير اللي بيتميز بيها المليونير، زي: القدرة على إدارة الوقت واستغلاله (Time management)، وكيفية استغلال جميع مهاراتك عشان تطور نفسك وتحسن مستقبلك (Abundance mentality).
فمعتقداتك وطريقة تفكيرك هي أساس نجاحك ووصولك لهدفك، وعشان الأساس ده يبقى قوي ويقدر يساعدك في طرق الوصول للهدف لازم يبقى مبني على معلومات صحيحة، ثم المعلومات تبدأ تتحول لأفكار ومعتقدات، والأفكار تتحول لسلوكيات، والسلوكيات تتحول لعادات، وعاداتك هتقودك لأهدافك.
ومن أهم العادات أو الهوايات اللي ممكن تجمع بيها أكبر قدر من المعلومات هي “القراءة”، لازم يبقى عنك عادة القراءة اليومية، اللي هتساعدك كل يوم على قراءة موضوع جديد ينور مخك ويساعد عقلك على إنه يفكر بطريقة أحسن وأكثر دقة، فالقراءة هتساعدك على توسيع مداركك والنظر بموضعية وبشكل أشمل وأعم لمختلف الأمور اللي في حياتك، وبالتالي هتقدر تاخد قرارات صح.
ابدأ أول خطواتك في اكتساب أسس المعلومات الصحيحة من خلال قراءة القائمة الجاية، هتلاقي فيها أهم 9 كتب تساعدك على تعلم أسس تفكير أنجح رجال الأعمال والمليونيرات:
1- Rich Dad Poor Dad
2- Principles
3- The Success System That Never Fails
4- The 4-Hour Work Week
5- Poor Charlie’s almanack
6- The Richest Man in Babylon
7- The Little Book of Common Sense Investing
8- Unlock it
9- SECRETS OF THE MILLIONAIRE MIND
ولو كنت من الناس اللي مش بتحب القراءة، تقدر تشاهد فيديوهات تلخيص هذه الكتب على اليوتيوب من خلال اللينك تحت اسم كل كتاب.
وافتكر دايمًا إن الشخص الناجح اللي بيتحول لمليونير، هو شخص منظم وملتزم بمجموعة من العادات اليومية الصغيرة اللي بتقوده إلى أهدافه، عشان كدا مش مهم حجم الخطوة اللي بتاخدها كل يوم، المهم إن كل يوم تاخد خطوة جديدة في طريق حلمك، لإن أحب الأعمال إلى الله أدومها وإن قلت، ونجاحتنا الكبيرة ما هي إلا عادات صغيرة اتعودنا نعملها كل يوم بنجاح للوصول إلى أهدافنا.
2.مهارات المليونير(Millionaire Skillset)
هي مجموعة من المهارات اللي لازم تتعلمها عشان تقدر تحقق بيها هدفك، زي:
- مهارات القيادة (Leadership Skills).
- مهارات الإدارة (Management Skills).
- مهارات التسويق (Marketing Skills)
- مهارات التواصل (Communication Skills).
- مهارات الدخل المستمر (Income Skills).
3.مركبة المليونير (Millionaire Vehicle)
والمقصود بيها هو إن يكون عندك بيزنس خاص بيك حتى لو مشروع صغير بس هيكبر مع مرور الوقت ويتطور أكتر، وده هيكون بمثابة المركبة اللي هتقودها وتسير بيك نحو المليون الأول، فكر كأن المليون ده طريق سفر طويل وأنت محتاج تستغل كل إمكانياتك ومهاراتك عشان تقدر تكمل للأخر وتوصل لهدفك بنجاح.
إزاي تبدأ في تحقيق حلمك؟
اتكلمنا باستفاضة عن أول خطوات في تحقيق حلمك، وهي تغيير طريقة التفكير والتحلي بعقلية الشخص المليونير الناجح الملتزم، وإن إزاي تغيير طريقة التفكير هتوصلنا لأهدافنا بنجاح وفي زمن محدد، لكن لازم تطبق طريقة التفكير الجديدة اللي اتعلمتها في خطواتك الفعلية خلال شغلك واجتهادك، ومن أهم الخطوات اللي هتساعدك تزود إنتاجياتك:
1.اشتغل بجد (Work Hard)
في بداية الرحلة لتحقيق طموحاتك في الحرية المالية، لازم هتبذل مجهود ضخم وتسعى بمختلف الطرق وفي مجالات كتيرة، وحط في بالك دايمًا إن وارد تتعرض للفشل والإحباطات، لكن إوعى تيأس أو توقف في النص، حاول تتعلم حاجة جديدة بإتقان، ومارسها بشكل يومي، وابدأ شوف النتايج وقيم شغلك وعدل خطواتك حسب النتايج.
مرحلة Work Hard هي المرحلة اللي أنت بتقرر فيها إنك لازم تتعلم حاجة جديدة، عشان اللي أنت بتعمله حاليًا مش هيوصلك لهدفك، فالتعلم بياخد وقت ومجهود، وممارسة اللي أنت اتعلمته بياخد وقت ومجهود أكبر، وبعدين تطلع لسوق العمل بمهاراتك الجديدة، وتبتدي تواجه مشاكل أكبر ومخاوف أكتر وإحباطات، كل ده بجانب إنك متواجد في شغلك الأساسي، وبالتالي الموضوع فعلًا صعب ومحتاج صبر وتحمل.
2.اشتغل بذكاء (Work Smart)
في الخطوة التانية، ابدأ فكر بشكل أعمق، إزاي تقدر تقلل المجهود شوية، عشان تقدر تستغل وقتك في تطوير شغلك وتنقل نفسك لمستوى أعلى، ممكن في المرحلة ديه، تبدأ تدور على شخص تاني يساعدك ويقوم ببعض الأعمال بدلًا منك بمقابل مادي مناسب.
مرحلة work smart بتبدأ بعد سنتين لخمس سنين من المرحلة الأولى، وقتها أنت بتشتغل على محور أكبر وأعم، لازم يبقى عندك دماغ رجل الأعمال الناجح، تبدأ تكتسب مجموعة تانية من المهارات تساعدك على تقليل الجهد المبذول وإزاي تختار فريق العمل اللي هيشتغل معاك وإزاي تقدر تقوده للنجاح.
3. فكر بذكاء (Think Hard)
أنت هنا بقيت قريب جدًا من تحقيق أهدافك، في المرحلة ديه لازم تعرف تدير فريق العمل بذكاء وتضع كل فرد منهم في المكان المناسب لإمكانياته، وتتعلم إزاي تاخد القرارات المصيرية اللي بتحتاج تفكير عميق وذكي، واللي بيها هتبدأ مرحلة جديدة في البيزنس بتاعك تكسب فيها عملاء أكتر ومال أكتر.
فناخد بالنا إن ما نفضلش نفكر كتير من البداية، وإلا ممكن ندخل في حالة بيسموها Paralysis by analysis، فالبداية بتكون مجهود وتجربة أشياء كتيرة وتقبل لفكرة الفشل، ثم المجهود يقل ونفكر في طرق أذكى، ثم نحلل بعمق عشان نقدر نحدد الخطوة الكبيرة الجاية.
اعرف ازاي ممكن توصل للنجاح الوظيفي من المقال دا: النجاح الوظيفي | شروطه، ومقوماته، وطرق الوصول إليه
وفي النهاية، لازم نعرف إن التوعية المالية وتحقيق الاستقلالية والحرية المالية مش وليد الصدفة، لكن بيحتاج تغيير طريقة التفكير والعمل على أساس خطة منظمة ومحكمة والتمتع بمجموعة من العادات اليومية المفيدة اللي هتساعدك على تحقيق أهدافك.
وافتكر دايمًا إنك لازم تستغل وقتك وجهدك وفلوسك بالشكل المناسب اللي يغير حياتك إلى الأفضل، وإن ربنا أمرنا بالسعي في كل الجهات والأخذ بالأسباب وحسن الظن به، فإنه لا يضيع أجر من أحسن عملًا.