كلام في الفريلانس

أهم النصائح لتحقيق الدخل الثابت من العمل عن بعد

مع موجة التطور المذهل في جميع نواحي الحياة واللي أدت بشكل أو بآخر إنها تساهم في زيادة احتياجات الإنسان المادية عشان يقدر يواكب التطور دا ويقدر يعيش في مستوى مادي كويس، اضطر كتير جدا من الناس إنهم يدوروا على شغل إضافي.

أو خلينا نقول إن البعض الآخر من الناس مكنش بيحب وظيفته اللي كان بيشتغلها واتجه إنه يعمل كارير شيفت لحاجة هو ماهر فيها وبيحبها.

ومع شيوع العمل الحر على الإنترنت واللي أصبح ناس كتير بتفضله لمميزاته المختلفة، كان فيه سؤال بيشغل ناس كتير جدا، وهو كيفية تحقيق الدخل الثابت من العمل عن بعد.

في المقال دا هنديك شوية نصائح لتحقيق دخل ثابت من العمل الحر…

كيف تحقق دخل ثابت من العمل الحر؟

خلينا نتفق الأول إن وصولك لمرحلة تحقيق الدخل الثابت من العمل الحر يحتاج منك عزيمة وصبر طويل، بجانب سعيك الدائم لتطوير نفسك وتطوير علاقاتك مع العملاء وتطوير مهاراتك.

كمان فيه ملاحظة مهمة لازم تاخد بالك منها وهي إن الدخل الثابت دا يفضل تقيسه بشكل سنوي لأن طبيعة العمل الحر بتختلف من شهر للتاني، يعني ممكن تلاقي نفسك اشتغلت حلو خالص في شهر من الشهور والشهر اللي بعده كان الشغل أكتر أو أقل، إلا لو قدرت تتعاقد مع شركة أو جهة معينة بتبعتلك شغل شبه ثابت شهريا.

مش محتاج أنبه إن لازم يكون عندك ثقافة ادخار وخطة إدارة أموال محترمة عشان تقدر تتفادى أي نقص في ميزانيتك الشهرية أو في حال تعرضك لأي ظرف طارئ يخليك توقف العمل الحر لفترة من الزمن.

طيب خلينا نتكلم بشكل سريع عن أهم النصايح اللي ممكن تساعدك في تحقيق دخل ثابت وهي…

ادّي العميل أفضل حاجة عندك

لازم تخلي العميل يشوف قدراتك ومهاراتك ومتبخلش بأي حاجة عليه، يعني متكتفيش بإنك تخلص الشغل المطلوب منك وخلاص، ولكن حاول تطلع الشغل بأفضل صورة ممكنة وباحترافية لدرجة تفوق توقعات العميل.

ودا يخلينا نقول إنك لازم تاخد بالك من تطوير المهارات بتاعتك بصورة مستمرة وتبقى مطلع على كل ما هو جديد في مجالك.

ممكن تقدم اقتراحات للعميل تفيده في تحسين شغله زي مثلا إنك تقترح عليه تصميم معين للوجو بتاع شركته أو طريقة معينة لعرض المحتوى في الموقع بتاعه، وهكذا… دا هيخلي العميل يبقى ممتن ليك.

أكيد كل دا هيساهم في إن العميل يفضل الشغل معاك وبالتالي هيبعتلك شغل دايما، وبكدا تكون سعيت في تحقيق دخل ثابت.

خليك منظم ومتعملش مشكلة مع العميل

حاول تفهم إيه المطلوب منك بالظبط في الشغل عشان ميبقاش فيه حاجة مش واضحة بالنسبة لك وتسبب حدوث خطأ في الشغل بسبب سوء فهمك.

فيه بعض الناس مش بتحب تسأل العميل على تفاصيل الشغل عشان خايفين إن العميل يتضايق من كتر الأسئلة، ولكن اللي متعرفهوش إن دا ممكن يخليك تعمل الشغل غلط أو مش زي ما العميل حابب، وبكدا هتخلي العميل ياخد انطباع وحش عنك وأكيد أكيد هيتضايق منك.

خليك منظم ووضح كل حاجة للعميل سواء الوقت اللي هتحتاجه في تنفيذ الشغل أو مدى إمكانيتك في تنفيذ طلبات معينة، ومهم جدا تلتزم بمواعيد الديدلاين اللي حاططها العميل أو اللي أنت حطيتها لنفسك وقلت عليها للعميل… كل دا هيخلي العميل يتمسك بيك لأنك منظم وبتنفذ وعودك وبتلتزم بمواعيدك.

ودا يخلينا ننبه إنك لازم تفكركويس قبل ما تقول للعميل على الوقت اللي هتحتاجه في تنفيذ الشغل، يعني حاول تدي نفسك فرصة كافية تقدر تخلص فيها الشغل باحترافية ومن غير أخطاء، ودا ينطبق برضو على التعديلات اللي ممكن يطلبها منك العميل على الشغل… كل دا مهم عشان مترفعش سقف توقعات العميل واللي ممكن تخليه يخيب ظنه فيك.

حاول تتجنب مجادلة العميل

أكيد لازم تحصل خلافات بينك وبين العميل في وجهات النظر أو في طريقة الشغل، وبالتالي بتحصل نقاشات بينك وبين العميل، يعني العميل بيكون عاوز حاجة معينة وأنت شايف إنها مش أفضل حاجة.

حاول بقدر الإمكان تتجنب مجادلة العميل لو حصل الموضوع دا، ولكن وضح وجهة نظرك بطريقة واعية ومنطقية تقنع بيها العميل، ولو العميل أصر على رأيه يبقى لازم تسمع كلامه من غير نقاش زيادة يضايق العميل، ولازم تطلع الشغل كويس خالص من غير تقصير، يعني متعملش الشغل أي كلام عشان تثبت وجهة نظرك وتطلع العميل غلطان، خلي عندك أمانة في الشغل.

الموضوع دا هيدي انطباع كويس عنك عند العميل، لأنه هيحس إنك خايف على الشغل بتاعه كونك بتقدمله اقتراحات في البداية وبتناقشه في طريقة الشغل، وعشان عندك مرونة في التعامل مع طلباته وبتنفذها زي ما هو عايز وباحترافية.

خلي أسلوبك حلو في الكلام

طريقة تعاملك مع العميل بتساهم بشكل كبير في إنه يتمسك بيك ويشتغل معاك أكتر، ودا بيظهر في أسلوبك في الكلام معاه.

يعني لازم تعبر عن شكرك دايما للعميل وإنك سعيد بالشغل معاه وتتمنى إنه يحصل ما بينكم شغل وتعاون أكتر.

احرص دايما إنك تاخد فيد باك من العميل لأن دا هيحسسه إن رأيه مهم بالنسبة لك.

خلي متاح باستمرار واحرص على الرد بسرعة

لازم تتابع الميل بتاعك دايما ولو بتشتغل في منصات العمل الحر حاول تشغل الإشعارات اللي تخليك على علم بأي رسالة توصلك أو شغل جديد في مجالك.

أحيانا كتير بتلاقي بعض العملاء طالبين شغل مستعجل وبالتالي هتكون الأولوية للي يرد عليهم الأول.

حرصك على الرد بسرعة هيخلي عندك عملاء أكتر، وبالتالي تضمن استمرارية العمل وثبات الدخل.

خليك أمين في شغلك واوعى تخدع العميل

للأسف بعض الناس بيحتالوا في الشغل بتاعهم وبيخدعوا العملاء ويخلوا الشغل بيرفكت في المظهر العام ولكنه معمول أي كلام من غير جودة واحترافية، وبالتالي لو العميل اكتشف الموضوع دا يستحيل يرجع لك تاني وممكن كمان يديك تقييم سيء جدا ويحذر باقي العملاء إنهم يشتغلوا معاك.

حط نفسك دايما مكان العميل وشوف هل هتقبل بالشغل اللي عملته ولا لا.

اعرف ازاي تبقى محترف في مجال العمل الحر من المقال دا: كيفية احتراف مجال العمل الحر | 12 خطوة عملية

وفي النهاية، دي كانت شوية نصايح سريعة تساعدك إنك تحصل على دخل ثابت من العمل الحر.

افتكر دايما إن العمل الحر زي صيد السمك محتاج صبر وعزيمة عشان تقدر تحقق أعلى المكاسب.