كلام في الفريلانس

كيفية احتراف مجال العمل الحر | 12 خطوة عملية

يعتبر العمل الحر من أفضل الطرق اللي بتضعك على أول طريق الحرية المالية، فيساعدك على زيادة دخلك المادي، ومع مرور الوقت وباجتهادك بيتطور بيك الأمر لتصل إلى الاستقلالية المادية وبدء مجال البيزنس الخاص بك.

فلو زهقت من وظيفتك التقليدية، أو لو محتاج دخل إضافي ينعش حياتك المادية ويساعدك في التغلب على صعوبات الحياة، اقرأ المقال ده عشان يساعدك على احتراف مجال العمل الحر، ومن خلاله هتقدر تتعرف على متطلبات العمل الحر وأهم مهاراته.

متطلبات العمل الحر

عادةً ما يشغل بال المبتدئين في مجال العمل الحر مجموعة أسئلة بتدور حول متطلبات العمل الحر، زي:

• إزاي أبدا العمل الحر؟ 
• إيه اللي محتاجه في البداية؟
•  إزاي أحصل على العملاء وأضمن حقوقي المادية؟

عشان كدا، هنقولك إيه هي أهم المتطلبات اللي هتساعدك في الإجابة عن كل أسئلتك وتسهل عليك الطريق لاحتراف مجال العمل الحر:

1.امتلاك المهارة

كل فرد فينا عنده مهارة معينة بيبرع فيها وبيلاقي فيها شغفه وسعادته، ولو كنت لسه مش عارف إيه هي مهاراتك المميزة ليك، حاول تتعلم مهارة جديدة تساعدك على اكتشاف نفسك من جديد، لإنها من الأشياء المكتسبة اللي يسهل فعلها.

فوارد إن الإنسان يتولد بمهارة معينة، زي: الرسم أو حب اللغات أو الكتابة أو حب البرمجة، وفي نفس الوقت ممكن للآخرين اكتساب أي مهارة عن طريق التعلم والممارسة والتدريب.

 2. طوَّر نفسك

افتكر دايمًا إن مهاراتك بحاجة للتطوير، فلو اعتمدت على إن عندك مهارة معينة أو حتى اكتسبت مهارة تانية وتوقفت عند النقطة ديه من غير أي تطوير، اعرف إنك بكدا مش بتتقدم أي خطوة في مجالك، بل بالعكس أنت بترجع للوراء خطوات كتيرة.

3. إدارة الوقت

تعتبر مهارة إدارة الوقت من أهم المتطلبات لاحتراف مجال العمل الحر، عشان كدا لازم تتعلم إدارة وقتك بشكل صحيح، وافتكر دايمًا المقولة الشهيرة اللي بتقول: “الوقت كالسيف إن لم تقطعه قطعك”، فأنت لوحدك اللي تقدر تتحكم في وقتك بشكل كامل.

ومن أهم مميزات العمل الحر إنه بيديك مطلق الحرية في اختيار الأوقات المناسبة ليك، لكن خلي بالك من ضرورة تنظيم الوقت بشكل جيد؛ عشان ما تتأخرش في تسليم الأعمال المطلوبة منك فيتسبب لك في خسارة قاعدة عملائك، فلو أحسنت استخدام وقتك هتكسب عملاء أكتر و شغل أكتر و بالتالي ربح أكبر.

حاول تعمل جدول وخطة لنفسك تساعدك على استثمار كل دقيقة في وقتك، لكن افتكر إن جسمك وصحتك وعيلتك وأصحابك ليهم حق عليك، فالعمل عبارة عن كرة مطاطية كل ما وقعت قفزت مرة أخرى، لكن العيلة والأصدقاء والصحة والروح كرات مصنوعة من الزجاج، لو وقعت هتتحطم ومش هترجع إلى سابق عهدها تاني.

4. التسويق

من أهم متطلبات احتراف مجال العمل الحر إنك تتعلم إزاي تسوق لنفسك بشكل صحيح، فالتسويق مش مجرد إني بزين شكل السلعة اللي معايا في عين العميل حتى لو هكذب عشان يشتري مني، لكن التسويق علم أكبر من كدا بكتير وله قواعد وأسس. 

ومن أهم خطوات التسويق لنفسك إن يكون عندك مهارة حقيقية بتبدع فيها وتعرف تعملها بإتقان، مش مجرد كلام فارغ عشان تكسب ثقة العملاء. فالتسويق هو إزاي تستثمر كل أداة في طريقك عشان تقدر تقنع العميل إن مهاراتك مختلفة وإنك قادر على تأدية المهام بشكل مختلف ومميز عن غيرك، لإن لو مهاراتك غير حقيقة وغير صادقة مش هتكسب ثقة أي عميل مهما عملت لنفسك تسويق. 

5.التعامل مع العملاء وكسب ثقتهم

اتعلم إزاي تراسل العملاء بشكل مهذب وبطريقة صحيحة وتكلمهم باحترام، وإزاي تبعت إيميل محترف للعملاء يكون بيتميز بآداب المراسلة العملية عشان تكسب ثقتهم فيك من قبل قبول العمل معاك.

6. العمل الحر ليس عملًا سهلًا في البداية

لازم تعرف إن العمل الحر في بدايته صعب وشاق زي أي عمل تاني جديد، لكن مع الاجتهاد وإتقان المهارات والالتزام بمواعيد تسليم المشاريع وجودة مستواها، تقدر تحقق النجاح فيه بمنتهى السهولة.

7.الأرباح

في بداية العمل الحرما تتوقعش إنك هتلاقي شغل كتير وإنك هتحقق مكاسب كبيرة وضخمة، فوارد في البداية إنك تشتغل أوقات طويلة وبجهد كبير مقابل مكسب قليل، حاول تصبر وتسعى على الرزق في أكتر من طريق، ومع مرور الوقت هتكتسب الخبرة الكافية وتقدر تكون قاعدة عملاء أكبر.

8. اتعلم إمتى تقبل المشروع وإمتى ترفضه

في بعض الأوقات رفضك لبعض المشاريع بيكون أفضل من إنك تقبله وتضيع فيه مجهود ووقت وغالبًا هيطلع بالنتيجة غير المرجوة، فممكن عميل يطلب منك مشروع كبير في وقت قليل، ولو قبلته من الوارد جدًا أن يقل إتقانك للمشروع وتكون النتيجة غير مرضية للعميل، ويتسبب لك في فيدباك سلبي عليك وفي خسارتك لعملاء كتير، حاول تضع دايمًا في ذهنك مبدأ “درء المفسدة مقدم على جلب المنفعة”.

9. ما تخافش من الرفض

أحياناً بيكون عندنا رهبة من الفشل أو رعب من الرفض، اتعلم إزاي تتعامل مع الرفض وتقبل إنك ممكن تترفض دي مش نهاية العالم ولا تعني أبدًا وجود أي نقص فيك، وحاول دايمًا مع كل رفض إن يزيد إصرارك على النجاح وتطوير مهاراتك والسعي لفرص تانية.

10. رأس المال

من أساسيات بداية أي بيزنس جديد امتلاك رأس المال، و امتلاكك لنوعية جيدة من اللاب توب وشبكة إنترنت قوية ومستقرة هي رأس مالك لاحتراف مجال العمل الحر، ولازم كمان تهتم بتطوير مهاراتك وإضافة مهارات جديدة لنفسك.

11. منصات العمل المختلفة

اهتم بحسابك الشخصي على أهم منصة رسمية للعمل في العالم وهي لينكدإن، اعرض عليها كل أعمالك وتبادل خبراتك مع الآخرين، وكمان اهتم بعمل حساب على أغلب منصات العمل الحر، زي: مستقل وخمسات وفريلانسر وأب ورك عشان تقدر تحصل على قاعدة كبيرة من العملاء.

اعرف أكتر عن منصات العمل الحر من المقال دا: دليلك التعريفي بمنصات العمل الحر

12. السيرة الذاتية

إمتلاكك لسيرة ذاتية مذهلة من أساسيات احتراف مجال العمل الحر، فهي الخطوة الأولى في تقديمك على أي وظيفة، اتعلم تعمل سيرة ذاتية منظمة ومحدد فيها تعليمك وكل مهاراتك وخبراتك، واكتبها خالية تمامًا من أي أخطاء إملائية ونحوية وبطريقة جذابة تختطف عين العميل من أول نظرة.

أهم مجالات العمل الحر

بتتعدد مهارات العمل الحر اللي ممكن تتقنها وتشتغل بيها على منصات العمل الحر المختلفة، زي:

• كتابة المحتوى.
• الكتابة التسويقية.
• الكتابة الإبداعية.
• التدقيق اللغوي
• الترجمة التحريرية.
• الترجمة التتبعية.
• التعليق الصوتي.
• الكتابة الأكاديمية.
• إدخال البيانات.
• التسويق الإلكتروني.
• تحسين محركات البحث.
• تطوير الشبكات.
• ترجمة الشاشة.
• التفريغ الصوتي.
• البرمجة.
• التصميم.

حاول في البداية إنك تختار إما مهارة بسيطة تقدر تعملها بسهولة زي التفريغ الصوتي، أو مهارة بتحبها وبتلاقي فيها نفسك عشان تنجح وتتميز فيها وتساعدك على احتراف مجال العمل الحر.

وأخيرًا، بنأمل إننا نكون وضعنا بين إيديك أهم المتطلبات والمهارات اللي تساعدك على احتراف مجال العمل الحر، حاول أنك تستغل وقتك وجهدك وابدأ من الآن.